Forseti sveitarstjórnar stígur til hliðar

Örlygur Hnefill Örlygsson, forseti sveitarstjórnar Norðurþings, ætlar að stíga til hliðar á sveitarstjórnarfundi sveitarfélagsins á þriðjudag og óskar leyfis í kjölfar samskipta sem hann átti við starfsmann sveitarfélagsins fyrr í sumar. Þetta staðfesti Örlygur í samtali við fréttastofu í kvöld og segist hafa farið fram úr sjálfum sér í samtali við starfsmanninn.

Samskiptin átti Örlygur við framkvæmdaraðila sveitarfélagsins og tengjast þau jarðvegsvinnu í kringum Hótel Cape sem Örlygur á og rekur á Húsavík.

Fyrr í sumar sumar hófst malbikunarvinna í kringum hótelið sem hefur að sögn Örlygs Hnefils dregist úr hófi fram bæði í tíma og fjármunum. Þá er framkvæmdunum enn ekki lokið. Örlygur Hnefill segir í samtali við fréttastofu að gestir hótelsins hafi orðið fyrir töluverðu ónæði vegna framkvæmdanna.

Þá hafi samskipti Örlygs Hnefils við umræddan framvæmdafulltrúa átt sér stað fyrir um mánuði síðan. Örlygur Hnefill segir að hann hafi strax áttað sig á því að hann hafi farið fram úr sér í samskiptum við starfsmanninn og sér eftir viðbrögðum sínum.

Örlygur Hnefill hefur gegnt stöðu forseta sveitarstjórnar Norðurþings fyrir Sjálfstæðisflokkinn síðan árið 2017. Þar áður hafði hann setið í sveitarstjórn Norðurþings frá árinu 2014.