Slökkviliðsmenn upplifa sig í hættu á vettvangi slysa og óhappa

Slökkviliðsmenn sem unnu á vettvangi umferðaróhapps á Reykjanesbraut á móts við Kauptún í morgun, töldu sig í hættu við vinnu sína en ökumenn annara bíla hægðu hvorki á sér né sýndu tillitssemi þegar ekið var í gegnum vettvanginn.

Slökkviliðsmenn unnu að hreinsun eftir að vörubifreið hafði ekið undir brúnna yfir Reykjanesbraut og rekið krana upp undir með þeim afleiðingum að glussavökvi fór á veginn sem getur verið hættulegt og myndað hálku. Varðstjóri hvetur ökumenn til þess  að virða aðstæður þar sem björgunaraðilar vinna á vettvangi slysa og óhappa.

„Við höfum orðið varir við það að þó að við séum mjög sýnilegir á vettvangi að þá þurfum við æ oftar að þrengja að umferðinni og loka jafnvel til að vera öruggir í okkar störfum. Við erum í umferðinni og teljum okkur oft bara vera í töluverðri hættu þar.

Við erum að bregðast við með því að bæta merkingar á bílum, bæta við ljós á bílum, bæta við okkar klæðnað með endurskini og sýnilegri en það er ekki nóg það þarf að draga úr umferðarhraða,“ segir Sigurður Lárus Fossberg, varðstjóri hjá Slökkviliði höfuðborgarsvæðisins.