Gráflekkóttur hrútur kom í heiminn í morgun

Það þykir sérstakt þegar lömb fæðast á haustin í stað vorsins en það gerðist þó í morgun á bænum Möðruvöllum 3 í Hörgárdal þegar ein af ánum bar gráflekkóttum hrúti. Á bænum eru um 350 fjár en ábúendur eru þau Birgitta Lúðvíksdóttir og Þórður Gunnar Sigurjónsson, sem búa á Möðruvöllum 3 og Sigmundur Sigurjónsson og Helga Steingrímsdóttir sem búa á Möðruvöllum 4.

„September og október ærnar voru geldar í vor og hafa fengið þegar geldærnar og hrútarnir voru sett út í vor. Það er æðislega gaman að fá lítið lamb á þessum árstíma til að gæla við í vetur“, segir Birgitta alsæl með lambið. Kindin er ný komin á Möðruvelli þar sem hún var keypt frá bænum Auðnum í Öxnadal, ásamt níu öðrum kindum.

Hún hefur ekki fengið nafn og ekki heldur hrúturinn en nafnið hans kemur í dag þegar krakkarnir á Möðruvöllunum koma úr skólanum, þau munu finna eitthvað fallegt nafn.