Gular viðvaranir í gildi

Gular viðvaranir eru í gildi vegna vinds á Suður- og Suðausturlandi í dag. Þá eru gular viðvaranir einnig í gildi fyrir Vestfirði, Strandir og Norðurland vestra frá miðnætti og fram á morgundaginn vegna hríðarveðurs.

Í hugleiðingum veðurfræðings á vef Veðurstofunnar segir að viðvaranirnar eigi einkum við undir Eyjafjöllum og í Öræfum þar sem hviður geta farið yfir 35 metra á sekúndu.

 

Núna með morgninum nálgast lægð úr suðri og mun hún valda því að það hvessir sunnanlands upp úr hádegi með rigningu.

„Þegar líður á daginn hvessir einnig annars staðar og fer að rigna þó að áhrifin af þessari lægð munu verða mest með suðurströndinni í dag.

Í kvöld snýst vindurinn til norðlægrar áttar og bætir í hann um landið norðanvert, fyrst á Vestfjörðum þar sem útlit er fyrir norðaustan storm með snjókomu í nótt og fram eftir degi á morgun. Gul viðvörun fyrir hríð er í gildi á þeim slóðum,“ segir meðal annars í hugleiðingum veðurfræðings.

Veðurhorfur í dag og næstu daga:

Vaxandi austlæg átt með morgninum, austan og norðaustan 13-23 m/s eftir hádegi með rigningu eða slyddu, fyrst syðst. Hvassast með S-ströndinni.

Norðlægari í kvöld og bætir í vind um landið N-vert. Norðaustan hvassviðri eða stormur N- og NV-til í nótt og á morgun með snjókomu. Lengst af hægari vindur A-lands með rigningu og styttir upp sunnan heiða. Allhvöss norðanátt um allt land annað kvöld og áfram úrkoma fyrir norðan.

Hiti 1 til 9 stig, mildast syðst.

Á fimmtudag:

Norðan hvassviðri eða stormur N- og NV-til með slyddu eða snjókomu, lengst af mun hægari vindur um landið A-vert og rigning, en styttir upp S-lands þegar líður á daginn. Hiti frá frostmarki í innsveitum fyrir norðan, upp í 8 stig syðst. Hægari um kvöldið.

Á föstudag:

Minnkandi norðanátt og léttir víða til, en él NA-til. Kalt í veðri.

Á laugardag:

Gengur í hvassa suðaustanátt með rigningu eða slyddu S- og V-lands, annars úrkomulítið. Hægari V-til um kvöldið. Hlýnar í veðri.