Stefnt að samræmdum kennitölum á Norðurlöndum

Áhersla verður lögð á málefni unga fólksins, sjálfbæra ferðamennsku og hafið undir formennsku Íslands í ráðherranefnd Norðurlandaráði á næsta ári. Þá er einnig unnið að því á vettvangi ráðsins að samræma kennitölur Norðurlanda til að auðvelda íbúum þeirra að athafna sig innan þeirra.

Sigurður Ingi Jóhannsson samstarfsráðherra Norðurlandanna fyrir Íslands hönd kynnti þær áherslur sem verða undir forystu Íslendinga sem hefst um áramótin á þingi Norðurlandaráðs í Osló í síðustu viku. Stofnað verður til skilgreindara verkefna sem höfða til ungs fólks, málefni hafsins í víðu samhengi verða á dagskrá ásamt sjálfbærri ferðamennsku.

Sigurður Ingi tekur undir með Katrínu Jakobsdóttur forsætisráðherra sem segir Norðurlandaráð hafa þróast í þá átt að tekið sé á fjölbreyttari og pólitískari verkefnum. Til að mynda sé unnið að samræmingu löggjafar á ýmsum sviðum.

„Já, við höfum fengið skýrslur þar sem hefur verið bent á að það sé mjög skynsamlegt að gera það. Það getur vel verið að þar séu hindranir í vegi. Jafnvel pólitískar á milli landanna. En eitt af því sem við höfum verið að vinna að og munum vinna að á næsta ári er skynsamleg leið til að leysa margar stjórnsýsluhindranir sem er sameiginleg kennitala. Rafræn kennitala.“

Þannig myndu íbúar landanna koma fram í stjórnsýslukerfum allra norrænu ríkjanna fimm með því einu að gefa upp sína rafrænu kennitölu. Þetta myndi létta mjög undir öllum flutningi fólks og aðgangi að réttindum á milli landanna. Sjálfbær ferðamennska er ofarlega á baugi á vettvangi Norðurlandaráðs. Víða annars staðar á Norðurlöndum hefur mikill vöxtur verið í ferðamennsku og sýn landanna því lík að sögn ráðherra.

„Þannig að það skiptir miklu máli. En það er þessi sameiginlega sýn um að vernda náttúruna en á sama tíma geta notið hennar.“