Golfstöðin sýnir milljarðaviðureign Tiger og Mickelson

Einstæður viðburður fer fram í Las Vegas þann 23. nóvember næstkomandi þegar stórkylfingarnir Tiger Woods og Phil Mickelson munu spila einn golfhring þar sem risastórar upphæðir eru í boði.

Sýn hf. hefur tryggt sér sýningarréttinn á beinni útsendingu frá viðburðinum hér á landi. Sýnt verður frá viðureigninni, eða The Match eins og hún er kölluð vestanhafs, klukkan 20.00. Upphitun hefst klukkutíma fyrr en reiknað er með að útsendingin standi yfir til eitt eftir miðnætti.

Útsendingin verður einnig seld sem stakur viðburður í myndlyklum Vodafone og Símans.

Níu milljónir dollara, jafnvirði 1,1 milljarða króna, er í húfi fyrir þann sem spilar átján holurnar á Shadow Greek Gold Course-vellinum í Las Vegas á færri höggum.

En auk þess að spila upp á stór peningaverðlaun munu þeir Tiger og Phil einnig setja ýmsilegt undir í hliðarveðmálum á meðan þeir spila hringinn. Til dæmis hver eigi lengsta upphafshöggið, hver komist næst holu, hver geti sett niður ákveðin pútt og svo framvegis.

Sjónvarpsútsendingin sjálf mun einnig veita áhorfendum innsýn í heim kylfinganna sem þeir hafa ekki fengist að kynnast áður. Þannig verða báðir kylfingar með hljóðnema á sér á meðan þeir spila, drónar notaðir til að veita ný sjónarhorn í útsendinguna og ýmis tölfræði notuð til að reikna út líkur á ákveðnum niðurstöðum út frá spilamennsku kappanna.

Tiger og Mickelson eru í hópi sigursælustu kylfinga sögunnar. Tiger hefur unnið fjórtán stórmót á ferlinum en Mickelson fimm, auk þess sem hann hefur sex sinnum hafnað í öðru sæti opna bandaríska meistaramótsins.