Neytendur greiða þriðjung sendingarkostnaðar frá Kína

Kostnaður Íslandspósts vegna erlendra póstsendinga nemur um 500 milljónum króna á ári. Neytendur greiða einungis þriðjung sendingarkostnaðar frá Kína vegna alþjóðasamninga.

Póstfyrirtæki glíma við nýjan veruleika. Almennum bréfasendingum fækkar en pakkasendingum vegna aukinnar vefverslunar fjölgar. Rætt hefur verið um lausafjárvanda Íslandspósts og hefur fyrirtækið óskar eftir láni frá ríkissjóði. Rök Íslandspósts eru þau að fyrirtækið fái ekki greitt fyrir raunkostnað lögbundinnar þjónustu fyrir ríkið.

Kína skilgreint sem þróunarríki

„Ófjármögnuð byrði vegna erlendra póstsendinga á síðasta ári var um 500 milljónir,“ segir Ingimundur Sigurpálsson forstjóri Íslandspósts. Að mestu leyti eru þetta sendingar frá Kína. Sendingar sem eru niðurgreiddar því í samningum Alþjóða póstsambandsins sem Ísland er aðili að er Kína enn flokkað sem þróunarland.

„Burðargjöld Alþjóða póstsambandsins standa ekki undir nema einum þriðja af dreifingarkostnaði hér innanlands, þannig að það er meðgjöf með þeim sendingum sem Pósturinn hefur staðið undir undanfarin ár. Það gefur auga leið að ekkert fyrirtæki getur niðurgreitt sendingar með þessum hætti.“

Svokallað umsýslugjald var hækkað í Svíþjóð til að mæta kostnaði vegna sendinga frá Kína, það nemur nú 1.050 krónum. Umsýslugjaldið er enn hærra í Noregi, þar nemur það 2.370 krónum.

Á Íslandi greiða flestir umsýslugjald sem nemur 595 krónum. Forstjóri Íslandspósts segist ekki vilja fara þá leið að hækka umsýslugjaldið vegna kostnaðar við póstsendingar frá Kína.