Jussi hættir sem afreksstjóri GSÍ

Finninn Jussi Pitkänen hættir sem afreksstjóri Golfsambands Íslands í febrúar á næsta ári en hann hefur starfað í tæp tvö ár fyrir golfsambandið.

Frá þessu er greint á golf.is í dag.

Síðasta verkefni Jussi í starfi verður að fara með afrekskylfingum Íslands í æfingabúðir í byrjun janúar.

„Ég vil þakka kylfingum, þjálfurum, foreldrum og golfsamfélaginu á Íslandi fyrir að leyfa mér að vera hluti af starfinu síðustu tvö ár,“ sagði Jussi við golf.is.

„Ég fer með ekkert nema góðar minningar frá tímanum hér.“

Jussi tekur við starfi landsliðsþjálfara Finnlands eftir að hann hættir hjá GSÍ.