Brasilískur heilari ákærður fyrir nauðgun og kynferðisbrot

Saksóknarar í Brasilíu hafa ákært João Teixeira de Faria, þekktan heilara, fyrir nauðgun og kynferðisbrot. Hundruð kvenna hafa sakað Faria um að brjóta kynferðislega gegn sér.

Faria er þekktur í heimalandinu undir nafninu „Jóhannes guðs“ [por. João de Deus] og hefur starfað sem „kristilegur heilari“. Hann skaust fyrst rækilega upp á stjörnuhimininn þegar bandaríski spjallþáttastjórnandinn Oprah Winfrey fjallaði um hann árið 2013.

Hann var handtekinn fyrr í þessum mánuði og hefur setið í fangelsi síðan. Konurnar, sem eru af ýmsum þjóðernum, saka hann um að hafa brotið gegn sér þegar þær leituðu til hans um andlega leiðsögn eða líkamlega heilun.

Ákæran gegn honum í Goiás er vegna fjögurra nauðgana og einnar kynferðisárásar, að sögn Reuters. Faria hefur ítrekað haldið fram sakleysi sínu.

Heilarinn hélt því meðal annars fram að hann gæti gert aðgerðir á fólki með höndunum einum saman og án deyfingar.