Foreldrum Freyju Haralds sárnar umræðan: „Fólk veit ekki hvað það er að tala um“

Freyju Haraldsdóttir þekkja flestir enda verið áberandi í þjóðfélagsumræðunni enda hefur fólk verið duglegt að lýsa skoðun sinni á henni, skoðunum hennar og hvað því finnst hún geta eða ekki geta.

Það hefur sést í baráttu henni um að fá að gerast fósturforeldri. Oft lítur út eins og Freyja sé ein í baráttu sinni en því fer fjarri. Með henni standa foreldrar hennar, tveir bræður, ömmur, vinir og fleiri sem sárnar oft umræðan um hana.

Sindri Sindrason hitti foreldra Freyju í Íslandi í dag á Stöð 2 í gær og var farið yfir sögu Freyju frá því hún fæddist og þær áskoranir sem þurfti að takast á við. Hún berst fyrir því að verða fósturforeldri með fullum stuðningi foreldra sinna.

„Ég hef alið hana upp í gegnum lífið að hún getur gert allt sem hana langar til,“ segir Auður Árnadóttir, móðir Freyju.

„Hún er búin að sýna það og sanna. Hún er búin að upplifa svo ótrúlega mikið og hefur svo mikið að gefa. Þó svo að hún kannski geti ekki tekið upp barn og faðmað það. Við gátum ekki tekið hana upp og faðmað hana og þurftum að finna aðrar leiðir.“

Orðræðan um að Freyja sé í engri aðstöðu til að ala upp barn sé oft á tíðum sár segir Auður.

„Ég verð stundum svolítið kjaftstopp þegar það er sagt svona við mig. Fólk veit ekki hvað það er að tala um og það þekkir hana ekki. Ég þekki dóttir mína, ég er búin að ala hana upp og hún á alveg eins að geta verið móðir. Það særir mig mjög mikið þegar fólk er að tala um þetta.“

Bæði viðurkenna þau að umræða í athugasemdarkerfinu um Freyju hafi oft sært þau mikið en eru bæði bjartsýn á framhaldið.

„Ég sé hana fyrir mér fara á námskeið, verða foreldri og við amma og afi. Það eiga allir þessar óskir að vinna, ferðast og verða foreldrar. Af hverju ekki hún líka?“

Auður og Haraldur, foreldrar Freyju, sögðu sögu sína í Íslandi í dag í gær og má sjá innslagið hér að neðan.