Dregur úr vindi eftir læti síðustu daga

Dregið hefur úr vindi á landinu eftir læti síðustu tvo daga þar svo tvær lægðir gengu yfir. Á vef Veðurstofunnar segir að þó sé útlit fyrir allhvassa suðaustanátt í dag og áfram vætusamt um landið vestanvert. Spáð er úrhellisrigningu suðaustantil sem mun halda áfram fram eftir morgundeginum. Hefur því verið gefin út gul viðvörun á Suðurausturlandi.

„Fyrir norðan stefnir í þurran og jafnvel bjartan dag með tveggja stafa hitatölum þegar best lætur.

Í komandi viku er útlit fyrir áframhaldandi suðlægar áttir með rigningu um landið S-vert og frekar milt veður. Nýjustu spár gera ráð fyrir kólanandi veðri á páskunum en það er enn langt í það og hafa ber í huga að vika er langur tími í veðurspám,“ segir í hugleiðingum veðurfræðings.

Veðurhorfur á landinu næstu daga

Í dag, sunnudag: Suðaustan 10-18 m/s með morgninum, en 8-15 á morgun. Talsverð rigning SA-til, væta með köflum um V-vert landið, en bjart með köflum norðan heiða. Hiti 6 til 13 stig, hlýjast yfir daginn á N-landi.

Á mánudag: Suðaustan 8-13 m/s og rigning, einkum á SA-landi, en þurrt norðantil. Hiti 7 til 12 stig.  

Á þriðjudag: Suðaustan 13-20 m/s og rigning, talsverð rigning SA-lands, en hægari og þurrt fyrir norðan. Hiti 5 til 10 stig.  

Á miðvikudag, fimmtudag (skírdagur) og föstudag (föstudagurinn langi): Suðlægar áttir og rigning eða súld með köflum, einkum SA-til, en lengst af þurrt NA-lands. Hiti yfirleitt 6 til 11 stig.  

Á laugardag: Útlit fyrir suðvestlæga átt með skúrum eða slydduéljum, en þurrt um landið NA-vert. Kólnar í veðri.