Roethlisberger biður Brown afsökunar

Það var ekki gott ástandið hjá Pittsburgh Steelers síðasta vetur og samband lykilmanna liðsins, Ben Roethlisberger og Antonio Brown, var í molum.

Roethlisberger, sem er leikstjórnandi liðsins, veit sem er að þessi leiðindi hafa verið honum að kenna og honum þykir miður að þau hafi leitt til vinslita.

„Ég var skammaður og það réttilega fyrir ummæli mín um Brown,“ sagði Roethlisberger en hann kastaði frá sér lykilbolta í leik gegn Denver og kenndi Brown um allt saman. Þeir hnakkrifust og Brown mætti ekki á æfingar í kjölfarið. Þarna urðu vinslit.

„Mér líður raunverulega illa yfir þessu og biðst afsökunar á þessu. Ég gekk of langt. Fyrirgefning nær bara svo og svo langt á samfélagsmiðlum. Ég get ekki tekið þetta til baka og vildi að ég gæti það því þetta eyðilagði vinskap okkar.“

Brown virðist ekki vera til í að fyrirgefa því hann henti í þetta tíst skömmu eftir að viðtalið við Roethlisberger fór í loftið.

Two face

— Antonio Brown (@AB84) May 20, 2019

Öll þessi læti enduðu með því að Brown vildi losna frá Steelers og úr varð að hann fór yfir til Oakland Raiders.