Vann sér sæti í byrjunarliði KR og fékk nýjan samning

Finnur Tómas Pálmason hefur skrifað undir nýjan samning við KR sem gildir til ársloka 2022. Þetta kemur fram á heimasíðu KR.

Finnur, sem er 18 ára miðvörður, hefur verið í byrjunarliði KR í síðustu fjórum leikjum liðsins í deild og bikar. KR-ingar hafa unnið þá alla og haldið hreinu í þremur þeirra.

Finnur var lánaður til Þróttar R. á síðasta tímabili og lék tólf leiki með liðinu í Inkasso-deildinni.

Hann á að baki 20 leiki fyrir yngri landslið Íslands. Hann var valinn í U-21 árs landsliðið á dögunum en dró sig út úr hópnum vegna smávægilegra meiðsla.

KR er í 3. sæti Pepsi Max-deildarinnar. Liðið sækir ÍA heim á laugardaginn.