Valdís Þóra upp um tólf sæti

Valdís Þóra Jónsdóttir fór upp um tólf sæti fyrir lokahringinn á taílenska meistaramótinu í golfi. Mótið er hluti af Evrópumótaröðinni.

Valdís lék þriðja hringinn í nótt á einu höggi undir pari. Það var hennar besti hringur á mótinu.

Skagakonan fékk fjóra fugla og þrjá skolla á þriðja hringnum og spilamennskan í nótt skilaði henni upp um tólf sæti, úr því 49. og í það 37.

Valdís er samtals á tveimur höggum yfir pari. Hún lék fyrsta hringinn á pari vallarins og annan hringinn á þremur höggum yfir pari. Það dugði henni til að komast í gegnum niðurskurðinn.