Erfiður lokahringur hjá Ólafíu

Ólafía Þórunn Kristinsdóttir, atvinnukylfingur, náði sér ekki á strik á Prasco Charity meistaramótinu sem fór fram í Ohio um helgina.

Mótið er hluti af Symetra-mótaröðinni en sú keppni er sú næst sterkasta í Bandaríkjunum á eftir LPGA mótaröðinni.

Hún var á parinu á fyrstu tveimur hringjunum og komst í gegnum niðurskurðinn en þriðji hringurinn reyndist erfiður í dag.

Hún fékk skolla strax á fyrstu holu og fimmtu holunni fékk hún aftur skolla. Tvöfaldur skolli á fjórtándu og skolli á sautjándu gerðu það að verkum að hún skilaði á fimm yfir pari.

Þegar þetta er skrifað er Ólafía í 50. sætinu í mótinu en ekki eru allir kylfingarnir búnir að klára þriðja hringinn.