Umferðarteppa niður Kambana

Tafir hafa orðið á umferð niður Kambana fyrir ofan Hveragerði í dag vegna malbikunar á Hellisheiði í vesturátt. Mynd, sem barst fréttastofu skömmu eftir klukkan sjö, má sjá að bílaröðin var nokkuð þétt niður að Hveragerði nú um kvöldmatarleytið.

Í tilkynningu frá Vegagerðinni í morgun segir að malbikað verði á Hellisheiði fram á miðnætti annað kvöld. Veginum er þannig lokað til vesturs frá Hveragerði að Hellisheiðarvirkjun en hjáleið er um Þrengslin. Hins vegar er opið fyrir umferð til austurs.

Fréttastofa hefur ekki náð í lögreglu á Suðurlandi í kvöld en RÚV hefur eftir lögreglu að lögreglumenn séu á vettvangi að stjórna umferð.

Uppfært klukkan 20:53:

Í tilkynningu frá malbikunarstöðinni Hlaðbæ Colas, sem sér um malbikun á Hellisheiði, segir að framkvæmdir gangi afar vel. Því sé áætlað að malbikun ljúki í nótt um klukkan fjögur og verður heiðin opin til austurs og vesturs á morgun, laugardag 20. júlí.

Hellisheiði: Verið er að malbika á Hellisheiði í dag og fram á miðnætti annað kvöld (laugardagskvöld). Lokað er til vesturs frá Hveragerði að Hellisheiðarvirkjun en hjáleið er um Þrengslin. Opið er fyrir umferð til austurs. #vegavinna #færðin

— Vegagerðin | Iceland Roads (@Vegagerdin) July 19, 2019