Holmes og Lowry efstir og jafnir | Endurkoma McIlroy dugði ekki til

Bandaríkjamaðurinn JB Holmes og Írinn Shane Lowry eru efstir og jafnir eftir tvo hringi á Opna breska meistaramótinu í golfi. Leikið er á Royal Portrush vellinum á Norður-Írlandi.

Holmes og Lowry eru samtals á átta höggum undir pari, einu höggi á undan Englendingunum Tommy Fleetwood og Lee Westwood.

Holmes var efstur eftir fyrsta hringinn á fimm höggum undir pari. Hann lék á þremur höggum undir pari í dag. Lowry lék á fjórum höggum undir pari, líkt og í gær. Írinn fékk sex fugla á fyrstu tíu holunum en engan á síðustu átta.

Our co-leader @ShaneLowryGolf#TheOpenpic.twitter.com/FZSA7ympZu

— The Open (@TheOpen) July 19, 2019

Suður-Afríkumaðurinn Dylan Frittelli var jafn Holmes og Lowry í efsta sæti mótsins en fór illa að ráði sínu á síðustu tveimur holunum þar sem hann fékk skramba og skolla. Frittelli er í 8. sæti á fimm höggum undir pari, líkt og efsti maður heimslistans, Brooks Koepka frá Bandaríkjunum.

Spánverjinn Jon Rahm, sem lék frábært golf á fyrri níu holunum í gær, féll niður um níu sæti í dag, úr því þriðja og í það tólfta. Hann er samtals á fjórum höggum undir pari.

Heimamaðurinn Rory McIlroy, sem lék illa á fyrsta hringnum, bætti sig um 14 högg í dag. Norður-Írinn gerði heiðarlega tilraun til að komast í gegnum niðurskurðinn og var á endanum aðeins einu höggi frá því.

A valiant fightback from a great Champion @McIlroyRory#TheOpenpic.twitter.com/KpLce7Ucet

— The Open (@TheOpen) July 19, 2019

McIlroy lék manna best í dag, á sex höggum undir pari líkt og Suður-Afríkumaðurinn Justin Harding (5. sæti) og Bandaríkjamaðurinn Xander Schauffele (18. sæti).

Tiger Woods komst ekki í gegnum niðurskurðinn. Hann lék á einu höggi undir pari í dag og endaði á sex höggum yfir pari. Phil Mickelson komst heldur ekki í gegnum niðurskurðinn.

Sigurvegarinn frá því í fyrra, Francesco Molinari, náði sér mun betur á strik í dag en í gær. Ítalinn lék á tveimur höggum undir pari og slapp í gegnum niðurskurðinn.

Bein útsending frá þriðja hring Opna breska hefst klukkan 09:00 á Stöð 2 Golf á morgun.