Fréttamenn sýknaðir af hryðjuverkaákærum í Tyrklandi

Dómstólar í Tyrklandi hafa sýknað tvo blaðamenn og einn mannréttindaaðgerðasinna af hryðjuverkaákærum. Frá þessu er greint á vef breska ríkisútvarpsins BBC.

Stefndu höfðu verið ásakaðir að hafa dreift hryðjuverkaáróðri í tengslum við störf þeirra hjá kúrdísku dagblaði, sem hefur síðan hætt störfum. Þau héldu því statt og stöðugt fram að þau væru aðeins að verja tjáningarfrelsi á tímum herts eftirlits undir stjórn Racep Tayyip Erdogan, Tyrklandsforseta.

Fréttamaður BBC í Istanbúl, Mark Lowen, greindi frá því að fagnaðarlæti hafi brotist út þegar dómurinn var kveðinn upp.

Talsmaður Reporters Without Borders (RSF) í Tyrklandi, Erol Onderoglu, fréttamaðurinn Ahmet Nesin og Sebnem Korur Fincanci, stjórnarmeðlimur Tyrklandsdeildar Human Rights Foundation voru handtekin í júní 2016.

Árleg skýrsla RSF um fjölmiðlafrelsi staðsetti Tyrkland númer 157 á listanum en alls eru 180 lönd skoðuð. Ástæða þess er þar á meðal sú að í Tyrklandi eru flestir fréttamenn fangelsaðir.

Árið 2018, voru alls 68 fréttamenn fangelsaðir í Tyrklandi, sem er langmest af öllum ríkjum í heiminum. Flestir þeirra sem sitja í fangelsi eða hafa verið ásakaðir fyrir glæp eru af kúrdískum uppruna.

Sverð Damóklesar

Onderoglu, Nesin og Fincanci voru gestaritstjórar kúrdíska dagblaðsins Ozgur Gundem árið 2016, sem leiddi það af sér að þau voru ákærð fyrir að framleiða áróður fyrir hönd kúrdíska verkamannaflokksins (PKK), sem er bannaður. Þau áttu hvert fyrir sig yfir höfði sér 14 ár í fangelsi.

Tveimur mánuðum eftir handtökuna, í ágúst í fyrra, var gerð húsleit í skrifstofum Ozgur Gundem og eftir það var miðlinum lokað fyrir fullt og allt.

Í yfirlýsingu sem birt var í apríl sagði Onderoglu: „Ég lít á þessi réttarhöld sem tilraun til að hræða fréttafólk og verndara mannréttinda í Tyrklandi. Það er þung byrgði fyrir nokkurn sem þráir lýðræði að vera sóttur til saka vegna atvinnu þeirra eða samstöðu.“

„Við höfum ekki áhyggjur yfir því að með okkur verði leikið eða við áreitt með hótunum um ofsóknir líkt og Sverð Damóklesar. Við höfum áhyggjur fyrir samfélagið allt; við hræðumst upplausn á réttlætiskenndinni sem tengir okkur öll saman.“

Fincanci var eini stefndi sem mætti fyrir dóminn í dag. Í lokaorðum sínum, áður en dómurinn var kveðinn upp, sagði Fincanci við salinn: „Eini glæpurinn sem var framinn hér var glæpur gegn málfrelsi.“

We are deeply relieved by @ErolOnderoglu's and his colleague's acquittal. BUT 3 years of absurd proceedings was already a form of unjust punishment. AND a new trial against Erol will start on 7 November. These charges must be dropped! #SupportErol #FreeTurkeyMedia pic.twitter.com/qHj6XaIx4E

— RSF (@RSF_inter) July 17, 2019

Þegar Fincanci yfirgaf dómssalinn heilsaði hún fréttafólkinu fyrir utan með sigurmerkinu, sem er einnig þekkt sem friðarmerkið.

Hún sagði í samtali við fréttastofu AFP að hún væri „mjög hissa“ yfir dómnum og bætti við: „Ég veit ekki hvernig ég á að bregðast við! Því miður eyddum við óþarfa tíma í fangelsi, sem er synd.“

RSF brást við sýknuninni á Twitter og sagðist vera „mjög létt.“ Samtökin kölluðu einnig eftir því að önnur ákæra gegn Onderoglu yrði felld niður en réttarhöldin eiga að hefjast í nóvember.