Næstbesti hringur Ólafíu

Ólafía Þórunn Kristinsdóttir hefur lokið leik á Marathon Classic-mótinu í Ohio í Bandaríkjunum. Mótið er hluti af LPGA-mótaröðinni.

Ólafía átti sinn næstbesta hring á mótinu í dag og lék á pari. Hún lék samtals á fimm höggum yfir pari og er í 76. sæti.

Ólafía byrjaði illa í dag og fékk tvo skolla á fyrstu þremur holunum. Hún fékk hins vegar aðeins tvo skolla á síðustu 15 holunum en fjóra fugla.

Þetta var fimmta mót Ólafíu á LPGA-mótaröðinni í ár og það fyrsta þar sem hún kemst í gegnum niðurskurðinn.

Sei Young Kim frá Suður-Kóreu er með eins höggs forskot á hina bandarísku Lexi Thompson á toppnum.

Bein útsending frá lokahring Marathon Classic-mótsins hefst klukkan 19:00 á Stöð 2 Sport 4.