Ragnhildur og Axel stóðu uppi sem sigurvegararar í Hvaleyrabikarnum

Axel Bóasson, úr GK, og Ragnhildur Kristinsdóttir, úr GR, stóðu uppi sem sigurvegarar á KPMG-mótinu, Hvaleyrabikarnum, sem fór fram á Hvaleyrinni um helgina.

Axel var í engum vandræðum á heimavelli og spilaði frábært golf á hringjunum þremur. Það skilaði honum tólf höggum undir pari og var tíu höggum á undan næstu mönnum.

Aron Snær Júlíusson, Tumi Hrafn Kúld og Hlynur Bergsson voru allir á tveimur höggum undir pari og áttu ekki roð í magnaðan Axel á heimavelli.

Í kvennaflokki var hins vegar meiri spenna. Ragnhildur Kristinsdóttir vann eftir mikla spennu en hún var einu höggi á undan heimastúlkunni, Guðrúnu Brá Björgvinsdóttur.

Fyrir síðustu holuna hafði Ragnhildur fjögurra högga forystu og spilaði hún átjándu holuna á þremur höggum yfir pari.

Hulda Clara Gestsdóttir endaði í þriðja sætinu, fimm höggum á eftir Guðrún og því sex höggum á eftir Ragnhildi.