Gröfur Vesturverks nálgast átakasvæðið í Árneshreppi

Vaxandi spenna er nú í Árneshreppi eftir því sem vinnuvélarnar nálgast jörðina Seljanes í vegagerð vegna Hvalárvirkjunar. Sá kostur er fyrir hendi að byggja í staðinn bryggju í Ófeigsfirði en stjórnarformaður Vesturverks segir yfirvöld fremur hafa viljað nýta núverandi veglínu til að valda sem minnstum umhverfisáhrifum. Þetta kom fram í fréttum Stöðvar 2.

Verktakar á vegum Vesturverks vinna þessa dagana að endurbótum vegarins um Ingólfsfjörð svo hann geti nýst flutningum vegna fyrirhugaðrar Hvalárvirkjunar. Ásgeir Margeirsson, stjórnarformaður Vesturverks, bendir á að aðrar leiðir hafi verið skoðaðar á fyrri stigum. 

„Meðal annars að byggja bryggju í Ófeigsfirði. Það er hægt að flytja stór tæki til dæmis á prömmum og þetta hefur verið gert. Sjálfur hef ég séð virkjanir erlendis þar sem þannig háttar að ekkert vegarsamband er. Þetta er hægt að gera."

„Það er hægt að leggja veg úr Djúpinu og yfir Ófeigsfjarðarheiði og inn á Hvalársvæðið. Það er hægt að leggja veg frá Steingrímsfjarðarheiði inn á Ófeigsfjarðarheiði. Þá leið höfum við nýtt að vetrarlagi á snjó,“ segir Ásgeir. 

Vinnuvélarnar eru nú í norðanverðum Ingólfsfirði. Senn líður að því að þær nálgist jörðina Seljanes en þar hafa landeigendur hótað því að koma í veg fyrir vegagerðina. Ásgeir telur að það sé minnihluti landeigenda á Seljanesi sem leggist gegn framkvæmdunum og segir að hluti landeigenda hafi lýst yfir stuðningi við þær.

„Hins vegar hafa yfirvöld beint því til okkar að reyna að nýta veginn sem fyrir liggur og þá veglínu sem þar er, eins og frekast er kostur, frekar en að fara í aðrar leiðir, sem ég var að nefna áðan, vegna þess að það myndi hafa meiri umhverfisáhrif í för með sér, og sveitarfélagið yrði þá af þeim samgöngubótum sem nú er verið að vinna að.“

Ásgeir segir Vesturverk telja sig vera í fullum rétti til að lagfæra veginn um Seljanes og Vegagerðin sé því sammála. En hvað ef fólk leggst til dæmis fyrir vinnuvélar á Seljanesi? 

„Þá tel ég að það sé lögreglumál, eins og dæmin sanna. Við höfum heimildir til þess að gera þetta. Við höfum leyfi yfirvalda til þess. Og ef að fólk vill stöðva það með einhverjum slíkum ráðum þá held ég að það sé komið hinumegin við lögin,“ svarar Ásgeir. 

Hér má sjá frétt Stöðvar 2: