Mark og stoðsending frá Rúnari og fyrsta stig Stefáns í Belgíu

Rúnar Már Sigurjónsson skoraði eitt og lagði upp annað er FC Astana vann 3-2 sigur á FH-bönunum í Aktobe í úrvalsdeildinni í Kasakstan í dag.

Rúnar Már skoraði annað mark Astana sem komst í 2-0 áður en Aktobe jafnaði í 2-2. Sigurmarkið kom skömmu fyrir leikslok en Astana er í 2. sætinu, stigi á eftir toppliðinu.

Stefán Gíslason og lærisveinar í Lommel gerðu markalaust jafntefli við Lokeren í belgísku B-deildinni í knattspyrnu. Kolbeinn Þórðarson kom inn sem varamaður í hálfleik.

Guðlaugur Victor Pálsson lék síðustu sex mínúturnar í 6-1 sigri Darmstadt á FC Oberneuland í þýsku bikarkeppninni í knattspyrnu.

Mikael Anderson var ónotaður varamaður hjá Midtjylland sem vann fimmta sigurinn í fimmm leikjum er liðið vann 2-0 útisigur á Horsens. Midtjylland er ásamt FCK á toppi dönsku deildarinnar.