Stöðug spilamennska Valdísar Þóru

Valdís Þóra Jónsdóttir, atvinnukylfingur úr Leyni, lék annan hringinn á 1. stigi úrtökumótsins fyrir LPGA-mótaröðina, þá sterkustu í heimi, á einu höggi yfir pari.

Valdís er í 67. sæti mótsins á samtals einu höggi yfir pari.

Alls taka 353 kylfingar þátt á þessu 1. stigi úrtökumótsins. Riley Rennell frá Bandaríkjunum er efst á átta höggum undir pari.

Valdís fékk sinn eina fugl á 4. holu. Á næstu fjórum holum fékk hún tvo skolla en svo par á síðustu tíu holunum.

Skorið verður niður eftir þrjá hringi á mótinu. Á lokahringnum berjast þeir sem komust í gegnum niðurskurðinn um a.m.k. 60 stig á næsta stigi úrtökumótsins.