Fyrsti sigur KA/Þórs kom gegn HK

KA/Þór vann eins marks sigur á HK í Olísdeild kvenna í kvöld.

Akureyringarnir höfðu ekki unnið leik í fyrstu tveimur umferðunum en þær tóku undirtökin snemma leiks fyrir norðan í kvöld og voru 15-12 yfir í hálfleik.

HK var þó aldrei langt undan og varð munurinn aldrei meiri en þrjú mörk. KA/Þór vann að lokum 26-25 sigur.

Martha Hermannsdóttir var markahæst með sjö mörk og Rakel Sara Elvarsdóttir skoraði sex. Hjá HK var Díana Kristín Sigmarsdóttir markahæst með sjö mörk.