Sagður hafa lýst áætlunum um að drepa saksóknara og hengja lögreglustjóra

Saksóknari hjá lögreglunni á höfuðborgarsvæðinu segir karlmann um þrítugt hafa hringt í sig dag sem nótt og sömuleiðis eiginmann sinn. Engu máli skipti þótt saksóknarinn væri hættur rannsókn máls mannsins sem er brotaþoli í málinu sem er til rannsóknar.

Vísir greindi frá því í morgun að vanhæfi hefði komið í veg fyrir að Landsréttur staðfesti nálgunarbann sem saksóknarinn fór fram vegna áreitis mannsins og ótta við hann. Var kröfunni vísað aftur í héraðsdóm til meðferðar.

Í greinagerð lögreglu sem fylgdi nálgunarbannskröfunni kemur fram að lögreglan á Suðurnesjum hafi haft afskipti af karlmanninum helgina 5. til 7. október því hann hafði þá margítrekað hringt í lögreglu og haft í hótunum við tvo nafngreinda fyrrum verjendur hans.

Sagðist hann jafnframt ætla „að drepa saksóknarann í málinu hans“. Þá hefði karlmaðurinn lýst yfir áhuga á að hengja lögreglustjóra.

92 símtöl á hálfu ári

Sömu helgi reyndi karlmaðurinn að hringja 25 sinnum í saksóknarann. Sagði hún háttsemina valda henni miklum óþægindum auk þess sem hún óttaðist karlmanninn. Munu símtölin frá apríl til október 2019 hafa verið 92 úr símanúmerum sem lögregla telur að séu mannsins.

Karlmaðurinn kaus ýmist að tjá sig ekki eða bar fyrir sig minnisleysi við skýrslutöku hjá lögreglu 23. október. Hann sagði þó að saksóknarinn væri að leggja sig í einelti en hún væri að „hringja í lögmannsstofur úti í bæ og skipta sér af málum tengdum mér.“

Í kjölfar skýrslutökunnar var honum kynnt ákvörðun lögreglustjóra um nálgunarbann sem hann sagðist samþykkja. Í greinagerð lögreglu segir saksóknari að maðurinn hafi ekki haft samband við hana síðan.

Að kvöldi 23. október sendi karlmaðurinn lögreglustjóra bréf og sagðist hafa kært nálgunarbannið og óskaði eftir því að honum yrði skipaður nýr verjandi. Daginn eftir hefði hann fylgt bréfinu eftir með öðru bréfi þar sem stóð: „Bíðum aðeins með þessa kæru.“

Í framhaldinu barst bréf frá Vilhjálmi H. Vilhjálmssyni, lögmanni mannsins, þar sem óskað var að nálgunarbannið yrði borið undir dómara.

Þriggja mánaða nálgunarbann

Í úrskurði Héraðsdóms Vestfjarða, sem tók við málinu sökum vanhæfis lögreglunnar á höfuðborgarsvæðinu, kemur fram að gögn málsins beri með sér að karlmaðurinn hafi í heimildarleysi, með margítrekuðum og óvelkomnum símhringingum, raskað friði saksóknara í skilningi laga um nálgunarbann.

Án nálgunarbanns sé hann líklegur til að halda áfram háttsemi sinni. Skilyrði þóttu uppfyllt og úrskurðaði Héraðsdómur Vestfjarða nálgunarbann til þriggja mánaða en krafan hafði þó verið um lengra nálgunarbann.

Sú niðurstaða var kærð til Landsréttar sem ólíkt Héraðsdómi Vestfjarða tók til greina athugasemdir verjanda mannsins þess efnis að saksóknari í málinu væri vanhæfur til að bera fram kröfuna um nálgunarbann. Hann væri samstarfsmaður hins saksóknarans en báðir starfa hjá lögreglunni á höfuðborgarsvæðinu. Ljóst var að lögreglan á höfuðborgarsvæðinu væri vanhæf í málinu og því tilefni til að efast um hæfi saksóknara.

Var málinu því vísað aftur til meðferðar í héraðsdómi.

Upptekið tveggja áratuga kynferðisbrotamál

Auk saksóknarans sem krafðist nálgunarbanns kemur fram í greinagerð lögreglu að fyrrum verjandi þrítuga mannsins hefði tilkynnt lögreglu að hafa ítrekað fengið hringingar frá manninum úr leyninúmerum og hann haft í hótunum. Þá hefði hann sagt lögregluna hafa eyðilagt líf sitt. 

Karlmaðurinn þrítugi ber fyrir sig að hafa verið í maníu þegar hann hringdi. Hann fékk nýlega upptekið tæplega tveggja áratuga gamalt kynferðisbrotamál sem legið hefur þungt á honum.

Hann sagði sögu sína undir nafnleynd við Vísi vorið 2018. Hann sakar sálfræðing á sextugsaldri um að hafa nauðgað sér þegar hann var í áttunda bekk. Kærandinn er einhverfur og var lagður í einelti í grunnskóla og var látinn hitta skólasálfræðing vegna hegðunarvanda. Þar hafi sálfræðingurinn nauðgað honum og svo gefið honum kók og prins póló í lok tíma.

Það var svo mörgum árum síðar, eða árið 2014, sem karlmaðurinn ákvað að kæra brotið til lögreglu. Lögregla rannsakaði málið en það þótti ekki líklegt til sakfellingar. Engin vitni hefðu orðið að meintu broti og engin önnur gögn styddu meint kynferðisbrot. Einnig að sálfræðingurinn neitaði eindregið sök og væri málið því talið ólíklegt til sakfellis þar sem ónógum sönnunargögnum væri til að dreifa.

Sálfræðingurinn dæmdur fyrir nauðgun

Í aðdraganda þess að maðurinn lagði fram kæruna liggur fyrir að hann hringdi fjölmörg símtöl á heimili sálfræðingsins. Sálfræðingurinn tilkynnti símtölin til lögreglu en hann hefur alltaf neitað sök.

Segja má að svipmyndin hafi breyst í sumar þegar sálfræðingurinn var dæmdur í tveggja og hálfs árs fangelsi fyrir kynferðisbrot gegn fyrrum stjúpdóttur sinni. Hann áfrýjaði dómnum til Landsréttar.

Í framhaldinu féllst ríkissaksóknari á að taka á ný upp kæru mannsins og munu einhverjar nýjar upplýsingar eða framburður hafa orðið til þess.

Lögreglan á höfuðborgarsvæðinu sagði sig frá rannsókninni vegna vanhæfis og fór það á borð lögreglunnar á Vestfjörðum. Mun það nú vera komið á borð héraðssaksóknara þar sem ákvörðun verður tekin um hvort ákært verður í því.