Yfir 15 stiga hiti í hnjúkaþey fyrir norðan

Lægðir við suðurhluta Grænlands og hæð yfir Írlandi beina til okkar hlýju og röku lofti langt sunnan úr höfum að því er segir í hugleiðingum veðurfræðings á vef Veðurstofu Íslands.

Því er loftið hlýtt yfir landinu og gæti hiti náð yfir 15 stig í hnjúkaþey um norðanvert landið.

Annars er í dag útlit fyrir sunnan strekking eða allhvassan vind en í kvöld og nótt má búast við hvassviðri eða stormi í vindstrengjum á norðanverðu landinu. Þá eru horfur á rigningu eða súld en þurrir kaflar á Norður- og Austurlandi.

Á morgun er því spáð að kröpp smálægð fari yfir landið frá norðri til suðurs. Verður vindáttin lengst af suðlæg og mjög vætusamt.

Undir kvöld snýst vindur svo til vestlægrar áttar á vestanverðu landinu. Þar mun kólna og slyddukennd úrkoma lætur á sér kræla ef að líkum lætur.

Veðurhorfur á landinu:

Gengur í sunnan 10-18 m/s eftir hádegi, en hvassara í vindstrengjum norðanlands í kvöld og nótt. Víða rigning, en úrkomulítið norðaustan til á landinu. Hiti 7 til 16 stig síðdegis, hlýjast fyrir norðan.

Áfram stíf suðlæg átt á morgun og rigning með köflum, talsverð úrkoma sunnan til á landinu eftir hádegi. Vestlægari undir kvöld á vestanverðu landinu með slyddu og kólnar.

Á þriðjudag:

Suðlæg átt 10-18 m/s og rigning með köflum, talsverð úrkoma sunnan til á landinu síðdegis. Hiti 4 til 12 stig, hlýjast á Austurlandi. Vestlægari um kvöldið á vestanverðu landinu með éljum og kólnar.

Á miðvikudag:

Suðvestan 8-15 með éljagangi, en bjartviðri norðaustan til. Kólnandi, frost 0 til 5 stig seinnipartinn.

Á fimmtudag og föstudag:

Norðlæg átt með snjókomu eða éljum norðanlands, en yfirleitt þurrt og bjart syðra. Frost 1 til 10 stig.