Hita­metið í Ástralíu slegið annan daginn í röð

Stjórnvöld í fjölmennasta ríki Ástralíu, New South Wales, hafa lýst yfir sjö daga neyðarástandi í ríkinu vegna mikilla skógar- og kjarrelda. Auk skógareldanna geisar nú mikil hitabylgja í landinu.

Á þriðjudag féll met í Ástralíu þar sem meðalhitinn í öllu landinu náði methæðum og mældist 40,9 gráður en í gær var það met slegið og það nokkuð rækilega, þegar meðalhitinn mældist 41,9 gráður.

Um hundrað aðskildir eldar brenna nú á svæðinu og rúmlega tvö þúsund slökkviliðsmenn berjast við þá. Tekist hefur að ná tökum á um helmingi eldanna en hinir brenna stjórnlaust.

Hitinn í miðborg stórborgarinnar Sydney fór í morgun í 39 gráður og í úthverfum sýndu mælar rúmar 42 gráður.

Síðustu mánuði hefur ástandið í Ástralíu verið afar slæmt og alls hafa þrjár milljónir hektara brunnið síðustu mánuði. Sex hafa látið lífið og rúmlega átta hundruð heimili hafa orðið eldunum að bráð.