Sportpakkinn: Messi með met hjá bæði Pele og Xavi í sjónmáli

Lionel Messi hefur slegið ófá metin á glæsilegum ferli en Arnar Björnsson komst að því að fleiri met gætu fallið á nýju ári.

Það eru fastir liðir eins og venjulega í spænska fótboltanum, Barcelona er á toppnum. Þetta er áttunda árið af síðustu tíu þar sem Katalónarnir eru í efsta sæti þegar nýtt ár gengur í garð. Sjö sinnum af þessum átta skiptum hefur liðið síðan orðið Spánarmeistari.

Lionel Messi er markahæstur með 13 mörk, einu marki meira en Karim Benzema hjá Real Madríd og það þrátt fyrir að spila ekki fjóra fyrstu leikina vegna meiðsla. Árið var bara nokkuð þokkalegt hjá honum, hann skoraði 50 mörk. Það er hans næst slakasti árangur undanfarin 10 ár. Fyrir sjö árum skoraði sá argentínski 91 mark en árið áður helmingi færri. Þá urðu mörkin „aðeins“ 45.

Messi er þegar búinn að bæta mörg met og það eru fleiri í sjónmáli.

Argentínumaðurinn er búinn að skora 618 mörk fyrir Barcelona og vantar 26 í viðbót til að slá met Brasilíumannsins Pele sem skoraði 643 lið fyrir Santos 1956-1974. Messi vantar 62 leiki til að verða sá leikjahæsti í 120 ára sögu Barcelona. Xavi á metið en hann spilaði 767 leiki fyrir Katalóníufélagið.

Líklegt má telja að Barcelona komist í meistaradeildina á næstu leiktíð, þá getur Messi jafnað við Ryan Giggs sem skoraði á sextán leiktíðum með Manchester United í deild þeirra bestu.

Keppni í La Liga hefst á nýjan leik 4. janúar en þá verður grannaslagurinn í Katalóníu á heimavelli Espanol.

Mörk Lionel Messi frá árinu 2010

2010 - 60 mörk = Barcelona (58) + Argentina (2)

2011 - 59 mörk = Barcelona (55) + Argentina (4)

2012 - 91 mark = Barcelona (79) + Argentína (12)

2013 - 45 mörk = Barcelona (39) + Argentína (6)

2014 - 58 mörk = Barcelona (50) + Argentína (8)

2015 - 52 mörk = Barcelona (48) + Argentína (4)

2016 - 59 mörk = Barcelona (51) + Argentína (8)

2017 - 54 mörk = Barcelona (50) + Argentína (4)

2018 - 51 mörk = Barcelona (47) + Argentína (4)

2019 - 50 mörk = Barcelona (45) + Argentína (5)

Það má sjá frétt Arnars Björnssonar um Lionel Messi hér fyrir neðan.