Sigvaldi: Segir mikið um hversu langt ég er kominn

Landsliðsmaðurinn í handbolta, Sigvaldi Guðjónsson, gengur í raðir pólska stórliðsins Kielce. Hann segist vera búinn að vinna sér inn fyrir þeirri velgengi sem hann hefur náð á síðustu árum.

Hægri hornamaðurinn hefur undanfarin ár leikið með Elverum í Noregi eftir mörg ár í Danmörku en hann ræddi við Guðjón Guðmundsson fyrir næstu verkefnum í Póllandi.

„Ég er rosalega spenntur. Ég held að þetta verði stórt skref fyrir mig persónulega að komast á þennan stað og segir mikið um hversu langt ég er kominn í þessu. Þetta tímabilið hefur verið mjög gott. Ég hef verið í góðu formi og er kominn í þessa þyngd sem ég vil vera í. Ég er búinn að vera mjög góður,“ sagði Sigvaldi. Þjálfari liðsins er enginn annar en Talant Dujshebaev.

„Þessi maður elskar handbolta og ekkert annað. Þetta er einn besti þjálfari í heimi og ég er spenntur að vinna með honum. Þetta verður spennandi og það er tilhlökkun og líka spila með þessum stórkostlegu strákum í liðinu. Það eru nokkrir mjög góðir leikmenn sem ég ætla að læra mikið af.“

Það tók sér tíma fyrir Sigvalda að vinna sig inn í landsliðið en það hefur tekist á síðustu stórmótum.

„Það er erfitt fyrir mig sem hefur búið svona lengi í Danmörku að fá fast sæti í Danmörku en þetta er búið að takast hægt og rólega. Þetta tók sinn tíma en þetta datt inn hjá Elverum og Gummi sá það. Ég er mjög þakklátur að vera valinn í þetta og spila fyrir Ísland.“

Sigvaldi verður ekki einn í Póllandi því Selfyssingurinn Haukur Þrastarson gengur einnig í raðir pólska liðsins í sumar.

„Það er mjög mikilvægt í byrjun. Við erum að læra pólskuna á fullu. Það er brekka en það er gott að vera með einn Hauk hjá mér,“ sagði Sigvaldi.