Í dag, á pálmasunnudegi klukkan 17, verður heimahelgistund streymt heim til landsmanna frá Vídalínskirkju.
Eins og svo margt annað fellur allt messuhald og fermingar í Þjóðkirkjunni niður í vor vegna samkomubannsins og faraldurs kórónuveiru.
Á meðan á þessu stendur ætlar kirkjan að koma til heimila þess fólks sem getur ekki heimsótt hana og er hægt að fylgjast með í beinni útsendingu hér á Vísi og einnig á sjónvarpsstöðinni Stöð 2 Vísir á kerfum Vodafone og Símans.
„Meðan samkomubann ríkir viljum við færa þjóðkirkjuna og hennar starf heim í stofu. Fólk getur átt þá hugleiðslu, bæn og kyrrð sem það annars myndi eiga í kirkjunni, heima hjá sér. Kirkjan hefur miklar skyldur gagnvart þjóðinni og þetta er ein leiðin til þess að uppfylla þær. Þrjár kirkjur ríða á vaðið, Laugarneskirkja, þá Lindakirkja og svo Vídalínskirkja, framhaldið spilum við svo eftir eyranu eftir því hvernig málin þróast,“ segir Pétur G. Markan, samskiptastjóri Biskupsstofu. Formið á helgistundunum svipar til messu, með hugvekju, bæn og tónlist, en er þó knappara, eða 25 til 30 mínútur.
Sóknarpresturinn sr. Jóna Hrönn Bolladóttir, leiðir heimahelgistundina.
Í síðustu viku var heimahelgistund streymt frá Laugarneskirkju og Lindarkirkju. Hægt er að horfa á þær í tengdu greinunum hér fyrir neðan.
