Biles fór úr buxunum á hvolfi

Simone Biles, sem unnið hefur til fleiri heimsmeistaratitla en nokkur önnur fimleikakona, hefur skorað á fylgjendur sína að klæða sig úr buxunum, standandi á höndum.

Biles, sem unnið hefur til 19 heimsmeistaratitla og fjögurra ólympíumeistaratitla, virtist ekki eiga í sérstaklega miklum vandræðum með að standast sjálf áskorunina í myndskeiði sem hún birti á Twitter. Yfir 12 milljónir manns hafa horft á vídjóið og fáeinum einnig tekist að standast áskorunina, sem gæti verið kærkomin fyrir margt íþróttafólk sem leiðist heima hjá sér á tímum kórónuveirufaraldursins.

Kórónuveiran hefur sett strik í reikninginn hjá Biles eins og öðru íþróttafólki en hún hafði ætlað sér stóra hluti á Ólympíuleikunum í Tókýó í sumar. Þeim var frestað um eitt ár. Hún vann fern gullverðlaun og ein bronsverðlaun í Ríó árið 2016. Síðasta haust vann Biles til fimm gullverðlauna á HM í Stuttgart og varð þar með sú sigursælasta á HM frá upphafi.