„Erfitt að vera fulltrúi svona lítillar þjóðar“

Golfweek ræddi við atvinnukylfinginn Ólafíu Þórunni Kristinsdóttur á dögunum. Viðtalið er hluti af greinaröðinni „Stuck at Home With“ þar sem kastljósinu er beint að kvennagolfi.

Í árslok 2016 varð Ólafía fyrst íslenskra kvenna til að tryggja sér þátttökurétt á LPGA-mótaröðinni, þeirri sterkustu í heimi. Árangrinum fylgdi mikil athygli og pressa sem tók sinn toll af Ólafíu.

„Það er erfitt að vera fulltrúi svona lítillar þjóðar, þar sem allir eru svo stoltir af þér og árangrinum sem þú náðir,“ segir Ólafía um í viðtalinu við Golfweek.

„Athygli fjölmiðla er mikil sem var nýtt fyrir mér. Það getur verið erfitt en þú verður að læra af því og það gerir þig betri.“

Ólafía er með þátttökurétt á Symetra-mótaröðinni en stefnir á að komast aftur í hóp þeirra bestu á LPGA.

Í viðtalinu ræðir Ólafía einnig um aðstæður til golfiðkunar á Íslandi, allar spurningarnar sem hún hefur fengið um landið og hvernig hún nýtir tímann meðan keppni liggur niðri vegna kórónuveirunnar.

Viðtalið við Ólafíu má lesa með því að smella hér.