Dagskráin í dag: Stórleikur Vals og KR, bikarmeistararnir mæta Fylki og Messi snýr aftur

Það verður heldur betur nóg um að vera á sportrásum Stöðvar 2 í dag, nú þegar Íslandsmótið í fótbolta er hafið, spænski boltinn farinn að rúlla og bestu kylfingar heims farnir af stað á ný.

Íslandsmeistarar KR sækja Val, liðið sem spáð er titlinum í ár, í fyrsta leiknum í Pepsi Max-deild karla í kvöld. Upphitun fyrir leikinn hefst kl. 19.10 á Stöð 2 Sport.

Fjórir leikir eru í beinni útsendingu í Pepsi Max-deild kvenna. Silfurlið síðasta árs, Breiðablik, mætir nýliðum FH sem hafa styrkt lið sitt vel í vetur, og bikarmeistarar Selfoss sækja Reykjavíkurmeistara Fylkis heim.

Mjólkurbikarinn er einnig í gangi um helgina og í dag verður leikur Grindavíkur og ÍBV, liðanna sem féllu úr úrvalsdeild í fyrra, sýndur beint á Stöð 2 Sport 3. Eftir leikinn, eða kl. 18, verður dregið í 32-liða úrslitin í beinni útsendingu en þá verða liðin 12 í Pepsi Max-deildinni með.

Lionel Messi snýr aftur eftir langa bið þegar Barcelona sækir Real Mallorca heim í kvöld í spænska boltanum. Fjórir leikir í spænsku 1. deildinni eru í beinni útsendingu í dag, á Stöð 2 Sport 2.

PGA-mótaröðin er hafin að nýju og þriðji keppnisdagur Charles Schwab Challenge er í beinni útsendingu á Stöð 2 Golf, og þar er toppbaráttan afar spennandi.

Allar beinar útsendingar dagsins má finna með því að smella hér.