Veiði hafin í Veiðivötnum

Veiði hófst í Veiðivötnum í morgun en vatnasvæðið er án efa eitt vinsælasta veiðisvæði landsins og því margir sem bíða spenntir eftir fréttum þaðan.

Við erum búin að fylgjast með Facebook fyllast af myndum frá veiðimönnum sem eru við vötnin í dag og það virðist vera fín veiði ef tekið er mið af þeim fjölda fiska sem eru á myndunum. Við erum búin að heyra af veiði í helstu vötnum eins og Litla Sjó, Hrauvötnum, Fossvötnum og Snjóölduvatni en veiðimaður sem er þar á ferð var þegar kominn með nokkrar bleikjur í morgun og í tvígang með tvær á í einu en þá er veitt á flugu með dropper.

Veðrið hefur verið meðágætum við vötnin í dag en spáin um helgina segir að það fari að blása aðeins. Það er ekkert verra því þegar það fer að blása til dæmis við Litlasjó er oft best að kasta upp í vindinn því urriðinn kemur þá gjarnan mjög nálægt landi og er að elta hornsíli. Við þessar aðstæður virkar Black Ghost á Intermediate línu til dæmis oft mjög vel.