Fjárheimild vegna forsetakosninga rúmar 432 milljónir

Endanlegur kostnaður vegna forsetakosninganna sem fram fóru síðastliðinn laugardag mun ekki liggja fyrir fyrr en eftir einhverjar vikur. Fjárheimild vegna kosninganna nemur hins vegar 432,2 milljónum króna.

Þetta kemur fram í svari dómsmálaráðuneytisins við fyrirspurn fréttastofu um kostnað vegna kosninganna. 

Kostnaður vegna forsetakosninganna 2016 nam 341 milljón króna. Ljóst er að ráðstafanir sem gerðar voru vegna Covid-19 fela í sér aukinn kostnað, meðal annars ráðstöfun sem gripið var til til að fólki í sóttkví yrði gert kleift að kjósa.