Ásmundur minnist blessaðs litla frænda síns

Ásmundur Friðriksson þingmaður Sjálfstæðisflokksins minnist frænda síns, Leifs Magnúsar Grétarssonar Thisland, með hlýju í grein sem birtist á vef Eyjar.net í gær. Leif Magnús lést þegar hann féll í Núpá í óveðrinu sem gekk yfir landið um miðjan desember síðastliðinn.

Leif Magnús fæddist í Kristiansand í Noregi 22. janúar 2003. Óskar Friðriksson, afi Leifs Magnúsar, er bróðir Ásmundar. Leif Magnús flutti til Vestmannaeyja sumarið 2011, þá átta ára gamall, eftir erfiða æsku í Noregi en móðir hans var myrt af norskum kærasta sínum í mars það ár.

Ásmundur hefur minningarorð sín á því að fjalla um harmleikinn sem setti mark sitt á fyrstu æviár Leifs Magnúsar.

„Þú varst bara 7 ára þegar þú ráfaðir aleinn í skóginum við Mandal. Heimabæ móður þinnar í Noregi og þú leitaðir hennar. Hún hafði verið tekin frá þér, farin upp til ljóssins sem þú reyndir að finna á milli þéttra trjátoppanna. En það tók þig ekki nema 9 ár að finna ljósið og mömmu þína eftir of stutta lífsgöngu, hrakinn og blautur,“ skrifar Ásmundur.

Tárin láku á hinni línunni

Þá er Ásmundi tíðrætt um ást Leifs Magnúsar á sveitinni, búskap og vinnuvélum. Hann lýsir því að hann hafi verið sérstaklega stoltur af litla frænda sínum við minnisstætt tilefni; Leif Magnúsi mannalegum að stýra traktor, aðeins fimmtán ára gömlum.

„Þú varst bara 15 ára, búinn að kaupa tvo traktora en fáir peyjar á þínum aldri geta stjórnað stærstu traktorum með heytætlur og rúlluvélar í eftirdragi. […] Þú snaraðist út úr bílnum, tókst stórt skrúfjárn og tengdir milli pólana á rafgeyminum og vélin hrökk í gang. Snaraðist fimlega upp stigann, inn í risa traktorinn, kúplaðir heytætlunni inn, settir í gír og vélin æddi af stað. Þú varst mannalegur frændi.

Ég horfði hugfanginn á eftir þér, þú hélst í stýrið og leist út um afturrúðuna til að athuga hvort allt væri í lagið og gjóaðir svo augunum til Ása frænda sem var eitt bros. Rosalega vorum við montnir á þessu augnabliki. Ég af þér og þú, náttúrubarn á heimavelli lífs þíns.“

Sjá einnig: Mynduðu kross á Heimakletti til minningar um elsku vin sinn Leif Magnus

Þá lýsir Ásmundur því að Leif Magnús hafi stefnt að því að klára nám. Þeir frændurnir hafi jafnframt stefnt að því að hittast í Vestmannaeyjum um jólin.

„Hann var kokhraustur og ætlaði að taka bílpróf í janúar og kaupa sér Mustang. Leif bar sig vel í símtalinu, en svo brast röddin. Hann var bara barn, blessaður litli frændi minn, óharðnaður og bjó að þyngri reynlsu en barn á að bera. Ég sagði honum ekki frá því að við hinn endann á línunni láku líka tárin mín. Við kvöddumst sem vinir með tárvot augu. Síðasta kveðjan var blaut og köld eins og Leif þegar hann kvaddi þennan heim á leið inn í ljósið á milli trjátoppanna í Mandal.“

Lesa má minningarorð Ásmundar í heild á vef Eyjar.net. Útför Leifs Magnúsar fer fram frá Landakirkju í Vestmannaeyjum á morgun, föstudaginn 10. janúar 2020 klukkan 15.