Sorpa hætt að senda flokkað plast beint í brennslu

Í haust hætti Sorpa að senda flokkað plast til orkuendurvinnslu og byrjaði fyrirtækið í október síðastliðnum að senda plastið aftur til flokkunar og efnisendurvinnslu í Svíþjóð.

Fram að því hafði allt flokkað plast sem fyrirtækið safnaði á höfuðborgarsvæðinu verið sent til brennslu í Svíþjóð þar sem það var nýtt til rafmagnsframleiðslu og húshitunar.

Viðbrögð við lokun markaða í Asíu

Gripið var til þessa ráðs eftir að mörg ríki í Asíu hættu nánast að taka við plasti til endurvinnslu árið 2018 sem gerði mörgum vestrænum ríkjum erfitt fyrir að koma plasti til efnisendurvinnslu. Með efnisendurvinnslu er átt við það þegar plastefni er endurnýtt til þess að búa til nýjar vörur eða efni.

Sjá einnig:Plastið enn brennt í Svíþjóð en breytingar gætu orðið á því í haust

„Við byrjuðum á þessu í byrjun október og er ástæðan sú aðallega að það er að öllu jöfnu umhverfisvænni leið að senda til efnisendurvinnslu heldur en orkuendurvinnslu,“ segir Björn H. Halldórsson, framkvæmdarstjóri Sorpu, í skriflegu svari til Vísis.

Samkvæmt upplýsingum frá Sorpu er ástæða þess að nú sé hægt að senda plastið til efnisendurvinnslu að nýjar verksmiðjur séu farnar að opna í Svíþjóð og öðrum löndum í kjölfar þess að markaðir í Kína lokuðu.

Hluti plastsins áfram brenndur

Þó hefur ekki enn náðst jafnvægi á markaðnum fyrir notað plast og ekki liggja fyrir tölur sem segja til um það hve hátt hlutfall plastefnis sem Sorpa sendir út fari til efnisendurvinnslu. Hluti plastsins verður áfram sendur til orkuendurvinnslu og metur samstarfsaðili Sorpu í Svíþjóð hvað sé endurvinnsluhæft.

„Allt það plast sem við sendum út í dag er ætlað til endurvinnslu. Hve mikið raunverulega endar í endurvinnslu og hvað mikið í orkuendurvinnslu á eftir að koma í ljós þegar niðurstöður flokkunar úti fara að berast,“ kemur fram í svari Björns.

Sjá einnig:Fleiri borgarbúar vilja flokka plast og biðlisti eftir tunnum

Hann segir ástæðu þess að ekki sé hægt að efnisendurvinna ákveðnar tegundir af plasti vera að ekki séu til tæknilegar aðferðir til að endurvinna allt plast.

„Samsettar plastumbúðir er ekki hægt að endurvinna en samsettar geta verið úr mörgum tegundum plasts (t.d. laminat sem er samlímt úr mörgum tegundum plasts) eða þá samsett með öðrum efnum eins og t.d. pappír eða ál.“

Betra að brenna til orkunýtingar en að urða

Slíkt plast sé alltaf sent í orkuendurvinnslu fremur en urðað. Í samtali við Vísi í júlí síðastliðnum sagði stjórnandi hjá Umhverfisstofnun að það sé alltaf betra að nota úrgangsplast í orkuframleiðslu líkt og gert er í Svíþjóð fremur en að urða það.

„Það er alltaf betra að úrgangur fari í orkuvinnslu, sem er endurnýting auðlindarinnar, heldur en að honum sé fargað á urðunarstöðum, sem á í öllum tilvikum að vera síðasta úrræðið,“ sagði Guðrún Lilja Kristinsdóttir, teymisstjóri á sviði loftslagsmála og græns samfélags hjá Umhverfisstofnun.

Sorpa hvetur jafnframt almenning til þess að draga úr notkun á plasti.

„Við hvetjum að sjálfsögðu alla, hér eftir sem hingað til, til að draga úr notkun á plasti og nýta plast sem nauðsynlegt er á sem umhverfisvænastan hátt,“ segir Björn H. Halldórsson, framkvæmdarstjóri Sorpu.