Appelsínugular viðvaranir og hviður allt að 50 m/s

Appelsínugul viðvörun er í gildi víða í dag og þangað til á morgun. Þegar hefur komið fram að ekkert ferðaveður verði á landinu þar til á miðvikudag en gert er ráð fyrir hviðum allt að 50 m/s á Suðausturlandi í dag.

Djúp lægð nálgast landið í suðri og stormur gengur á land eftir hádegi. Appelsínugular stormviðvaranir taka gildi um eða eftir hádegi á Suðurlandi, Suðausturlandi, Faxaflóa, Breiðafirði og Miðhálendinu. Þá eru appelsínugular hríðarviðvaranir á Vestfjörðum, Ströndum og Norðurlandi vestra.

Í þessum landshlutum er búist við vindi allt að 28 m/s. Einna hvassast verður undir Eyjafjöllum, Snæfellsnesi, austantil á Breiðafirði og almennt við fjöll en á áðurnefndum svæðum gætu hviður farið upp í 40 m/s.

Í ábendingu frá veðurfræðingi Vegagerðarinnar segir að staðbundið ofsaveður verði suðaustanlands. Hviður í Öræfum og við Lómagnúp gætu orðið allt að 40-50 m/s en óveðrið stendur yfir frá um klukkan 14 og fram á nótt.

Á höfuðborgarsvæðinu er hins vegar búist við skárra veðri en þar er aðeins gul viðvörun í gildi og gert ráð fyrir 15-23 m/s, með skafrenningi og lélegu skyggni í fyrstu.

Vegir lokaðir og ekkert ferðaveður

Þá eru gular hríðarviðvaranir í gildi á Norðurlandi eystra, Austurlandi að Glettingi og Austfjörðum frá því í kvöld og þangað til á morgun. Alls staðar á landinu má jafnframt búast við lélegu skyggni og samgöngutruflunum, enda ekkert ferðaveður líkt og áður hefur komið fram.

Vegfarendur eru beðnir að fylgjast vel með færð og veðri áður en lagt er í langferð, að því er fram kemur á vef Vegagerðarinnar. Beðið hefur verið með mokstur vegna veðurs á norðanverðum Vestfjörðum. Vegurinn um Þröskulda er lokaður og ófært er um Klettsháls. 

Þá er þungfært frá Hofsósi í Ketilás og lokað þaðan í Siglufjörð. Einnig má gera ráð fyrir lokun í dag frá Fosshóteli við Núpá að Jökulsárlóni frá 14:30 eða 15 þangað til klukkan sjö eða átta í fyrramálið, að morgni þriðjudags. Nálgast má upplýsingar um færð á vegum í rauntíma á vef Vegagerðarinnar.

Fréttin hefur verið uppfærð.