Fór holu í höggi og er á toppnum eftir þrjá hringi

Si Woo Kim trónir á toppnum þegar þrír hringir eru búnir á Wyndham meistaramótinu í golfi. Mótið er hluti af PGA-mótaröðinni.

Hinn 24 ára gamli kylfingur frá Suður-Kóreru hefur leikið frábærlega á fyrstu þremur hringjum mótsins. Hann er sem stendur á 18 höggum undir pari og fór til að mynda holu í höggi á hring dagsins.

Hann er með tveggja högga forystu á Doc Redman og Rob Oppenheim sem eru jafnir í öðru sæti mótsins.

Kim - sem varð yngsti kylfingur sögunnar til að vinna PGA-meistaramót fyrir þremur árum - stefnir því á sinn þriðja sigur í mótaröðinni er mótinu lýkur á morgun.