Telja nú að kvikan sé á þriggja til fimm kílómetra dýpi

Vísindaráð Almannavarna kom saman til fundar í dag þar sem farið var yfir stöðu mála vegna landriss og jarðskjálftavirkni við fjallið Þorbjörn á Reykjanesskaga.

Á fundinum var rýnt í þau gögn sem safnað hefur verið síðustu vikuna og benda þau til þess að kvikan sem um ræðir sé á þriggja til fimm kílómetra dýpi. Áður hafði verið áætlað að kvikan væri á þriggja til níu kílómetra dýpi. Þá var einnig farið yfir hugsanlega atburðarás sem gæti farið í gang ef til eldumbrota kæmi.

Að því er segir í tilkynningu á vef Veðurstofunnar eru vísbendingar um breytt mynstur í jarðskorpuhreyfingum.

Dregið hafi úr jarðskjálftavirkni undanfarna tvo sólarhringa en enn má sjá merki um áframhaldandi landris sem er nú orðið fimm sentimetrar þar sem það er mest.

„Um er að ræða langtímaatburð og er reynslan af öðrum sambærilegum atburðum sú að breytingar geta orðið í landrisi viku frá viku án þess að hægt sé að fullyrða um að virknin sé að fjara út.

Á næstu dögum verður metið hvort nauðsynlegt sé að fjölga mælitækjum til að fá betri mynd á þróun mála,“ segir á vef Veðurstofunnar.

 

Næsti fundur vísindaráðsins verður að óbreyttu eftir viku. Fundinn í dag sátu vísindamenn frá Veðurstofunni, Jarðvísindastofnun Háskóla Íslands og ÍSOR ásamt fulltrúum frá almannavarnadeild ríkislögreglustjóra, HS-Orku, Umhverfisstofnun og lögreglunni á Suðurnesjum.