Gular við­varanir, miklar leysingar og allt að þrettán stiga hiti

Mikilli úrkomu og leysingum er spáð á landinu í dag og á morgun, fimmtudag. Reikna má með vatnavöxtum og auknum líkum á krapaflóðum. Þá eru landsmenn hvattir til að hreinsa frá niðurföllum og fráveituskurðum. Gul asahlákuviðvörun er því í gildi um allt land vegna þessa.

Á morgun gengur hins vegar í sunnanstorm á Breiðafirði, Vestfjörðum, Ströndum, Norðurlandi vestra og Norðurlandi eystra. Gul stormviðvörun tekur því gildi í umræddum landshlutum snemma í fyrramálið.

Búast má við vindi 15-23 m/s og staðbundnum vindstrengjum allt að 40 m/s, hvassast norðanlands. Stormurinn verður varasamur ökutækjum sem taka á sig mikinn vind.

Í hugleiðingum veðurfræðings segir að Í dag verði sunnan og suðvestanátt, víða 10-18 m/s og rigning eða súld, en úrkomuminna austanlands. Sunnanáttinni fylgja hlýindi og búist er við fjögurra til ellefu stiga hita.

Þá dregur úr úrkomu í kvöld og hvessir í nótt líkt og áður segir. Það hlýnar enn frekar en hitinn verður að 13 stigum norðaustantil. Svo dregur úr vindi síðdegis og kólnar í veðri.

Veðurhorfur á landinu næstu daga

Á fimmtudag:

Sunnan 15-23 m/s, hvassast NV-til. Súld eða rigning, en þurrt að kalla N- og A-lands. Hiti 5 til 13 stig, hlýjast NA-til. Snýst í hægari suðvestanátt síðdegis, dregur úr vætu og kólnar í veðri.



Á föstudag:

Gengur í hvassa suðaustanátt, með vætusömu og mildu veðri, en úrkomulítið fyrir norðan.



Á laugardag:

Ákveðin suðaustlæg átt og víða snjókoma eða él, en þurrt að mestu fyrir norðan. Hiti kringum frostmark.



Á sunnudag:

Suðlæg átt með ofankomu víða um land, og heldur kólnandi veðri.



Á mánudag:

Líkur á að snúist í norðaustanátt með snjókomu eða éljum N-lands, en bjartviðri syðra. Áfram kalt í veðri



Á þriðjudag:

Útlit fyrir norðaustlæga eða breytilega átt, með éljum og köldu veðri.