Um fjöru­tíu skjálftar frá mið­nætti

Jarðskjálftavirkni hefur áfram mælst í grennd við Grindavík, frá miðnætti hafa mælst um fjörutíu skjálftar á svæðinu, flestir undir 2 að stærð.

Í færstu jarðvísindamanns segir að í gærkvöldi, klukkan 19:04, hafi mælst skjálfti af stærð 3,3 um tveimur kílómetrum norðaustur af Grindavík.

„Frá 21. janúar hafa yfir 1000 skjálftar verið staðsettir á svæðinu, þar af um 700 yfir helgina og voru þeir flestir staðsettir í SV/NA stefnu um 2 km NA af Grindavík.

Nýjasta GPS úrvinnslan sýnir áframhaldandi landris á svæðinu vestan við Þorbjörn. Í heildina hefur land risið yfir 4 cm frá 20. janúar sl. Gervitunglamyndir sýna sömu þróun.

Með landrisi má búast við áframhaldandi jarðskjálftavirkni. Líklegasta skýring þessarar virkni er kvikuinnskot á 3-9 km dýpi rétt vestan við Þorbjörn. Líklegast er að virknin ljúki án eldsumbrota,“ segir í tilkynningunni.