Mikill meirihluti fær væg einkenni flensunnar

Fyrsta tilfelli Covid-19 kórónuveirunnar var greint hér á landi í dag. Karlmaður um fimmtugt, sem var á ferðalagi um norður Ítalíu liggur veikur á spítala. Viðbúnaðarstig almannavarna hefur verið hækkað úr óvissustigi í hættustig. Almenningur er beðinn að sýna stillingu og fylgja fyrirmælum yfirvalda.

Almannavarnir og sóttvarnarlæknir greindu frá því í tilkynningu um miðjan dag að fyrsta tilfelli COVID-19 kórónaveiru hafi greinist á Íslandi.

Íslenskur karlmaður frá Reykjavík, sem var á ferðalagi í Ítalíu ásamt fleirum veiktist eftir heimkomu 22. febrúar síðastliðinn. Hann hafði verið á svæði í Norður-Ítalíu sem var skilgreint utan hættusvæðis.

Maðurinn var færður í einangrun á Landspítalanum hefur að smitið greindist jákvætt. Í kjölfar þessara fregna hefur ríkislögreglustóri hækkað viðbúnað upp í hættustig.

Fjölskylda, vinnufélagar og vinir mannsins til skoðunar

Samkvæmt upplýsingum frá heilbrigðisyfirvöldum er maðurinn ekki alvarlega veikur en sýnir dæmigerð einkenni COVID-19 veirunnar, það er hósti, hiti og beinverkir. Sýnataka og greining á veiru- og sýklafræðideildar staðfesti smitið laust eftir kl. 13:00 í dag. Fjölskylda mannsins er til skoðunar og þá vinna lögreglan og heilbrigðisyfirvöld vinna nú í því að kortleggja ferðir mannsins.

„Það er auðvitað margt enn á huldu um COVID-19, sem betur fer bætist stöðugt við þekkinguna. Við vitum að það er mikil meirihluti sem að fær væg einkenni, eða um 80% en því miður veikjast 5% alvarlega einkum af lungnabólgu,“ sagði Alma Möller, landlæknir á blaðamannafundi í dag.

Unnið að undirbúningi komu veirunnar í mánuð

Yfirvöld hafa unnið að því að smit greinist hér á landi í rúman mánuð. Landlæknir og framkvæmdastjóri meðferðarsviðs Landspítalans sögðu í dag að heilbrigðiskerfið og almannavarnir séu vel í stakk búin breiðist kórónuveiran frekar út. Áríðandi er að þeir sem hafi verið á áhættusvæðum erlendis og finni fyrir einkennum veirunnar hafi samband við heilbrigðisstarfsfólk í síma 1700. Þar er metið hvort ástæða sé til sýnatöku.

Gerið þið ráð fyrir fleiri smitum?

„Ég held að það megi alveg gera ráð fyrir fleiri smitum. hversu mörg þau verða er ógjörningur að segja en ég býst við því að þau verði fleiri,“ sagði Þórólfur Guðnason, sóttvarnalæknir.

Mikilvægt að sýna stillingu

Yfirvöld vilja fyrst og fremst koma því til almennings að fólk haldi stillingu þó svo að fyrsta tilfellið hafi verið greint hér á landi.

„Við höfum orðið vör við að börn séu hrædd. Það er mjög mikilvægt að við öll saman sem þjóð stöndum saman í þessu og tölum skynsamlega. Sinnum þeim leiðbeiningum sem gefnar eru út og tökum öll ábyrgð á okkar eigin gjörðum og okkar fjölskyldu og vinnum saman sem ein heild að takast á við þetta verkefni,“ sagði Víðir Reynisson, yfirlögregluþjónn hjá embætti Ríkislögreglustjóra.