Mikill viðbúnaður við hótelið á Tenerife

Lóa Pind Aldísardóttir, dagskrárgerðarmaður á Stöð 2, er stödd ásamt fjölskyldu sinni á Tenerife til að fagna sjötugsafmæli móður sinnar. Dóttir manns Lóu vakti þau eldsnemma í morgun með símtali frá Danmörku þar sem þeim var sagt að gestir hótelsins H10 Costa Adeje Palace væru í sóttkví eftir að það tók að spyrjast út að ítalskur læknir, sem dvaldi á hótelinu, væri í reynd smitaður af Covid-19. Dóttir manns Lóu er blaðamaður á Politiken en hún vildi fá þau til að ná í myndefni fyrir fjölmiðilinn og brugðust þau að sjálfsögðu vel við þeirri bón.

Lóa lýsti aðstæðum á vettvangi í hádegisfréttum Bylgjunnar en þá var hún stödd fyrir utan hótelið þar sem viðbúnaður var mikill.

„Það er talsvert af lögreglubílum hérna í kringum hótelið. Ég myndi giska á að það væru svona tíu, tuttugu lögregluþjónar sem eru að gæta þess að fólk komi ekki að hótelinu. Þegar við mættum svona um níuleytið í morgun þá var ein spænsk sjónvarpsstöð og svo fjölgaði þeim nú töluvert og eitthvað af forvitnum vegfarendum að ráfa hérna í kring. Flestir verða reyndar pínu skelkaðir þegar þeir átta sig á því að það er kórónavírusinn sem veldur því að það er búið að loka öllum leiðum að hótelinu.“

Fyrst sandstormurinn svo kórónaveiran

Lóa sagðist ekki hafa heyrt frá mörgum Íslendingum á Tenerife þegar hún var spurð hvernig hljóðið væri í þeim.

„Fólk er nú svona sæmilega rólegt enda varla annað hægt en að vera rólegur hérna á þessu svæði en ég get ímyndað mér að stemningin sé önnur á meðal þessara sjö Íslendinga og allra hótelgestanna sem við sjáum hérna, þeir eru sumir hangandi úti á svölum, væntanlega að tala við vini og vandamenn heima hjá sér. Ég heyrði í einni sem hafði átt leið hér um í gær, kom inn á hótelið til að spyrja til vegar. Ég hugsa að hún sjái nú dálítið eftir því en það var Íslendingur sem gerði það. Einhverjir hafa sagt: „Það á ekki af okkur að ganga hérna. Fyrst versti sandstormur sem sést hefur í áratugi og svo kórónavírusinn.“

Aðspurð hvort hún sjálf fyndi fyrir kvíða eða óþægindum vegna kórónaveirunnar sagði Lóa.

„Ég er nú reyndar bara frísk og hraust kona á besta aldri og óttast þetta ekkert, þannig. En ég verð að viðurkenna að í fyrsta skiptið þá settist ég niður og las mér til um einkennin kórónaveirunnar. Hér er fullt af eldra fólki en það hlýtur að vera smá beygur í þeim og svo að sjálfsögðu fólkinu sem er fast á þessu hóteli.

Ég hef nú samt ekkert hugsað mér að stytta þessa dvöl. Við eigum flug heim á föstudaginn og vonandi verður okkur hleypt frá eyjunni, en ef ekki þá er þetta ekkert versti staður í heimi til að vera kyrrsettur á,“ segir Lóa Pind glöð í bragði.