Niðurstaða lögreglu að kveikt hafi verið í

Niðurstaða lögreglurannsóknar á brunanum á Bræðraborgarstíg 1 er að kveikt hafi verið í. Tíu manns sem bjuggu í húsinu og fjölskyldur þeirra sem létust ætla að fara fram á miskabætur frá þeim sem grunaða. Einnig er til skoðunar að fara í mál við eiganda hússins.

Þrír létust í brunanum sem varð á Bræðraborgarstíg í lok júní. Karlmaður á sjötugsaldri var handtekinn skömmu eftir að eldurinn kom upp og hefur verið í haldi lögreglu síðan þá. Bruninn er rannsakaður sem manndráp af ásetningi.

Niðurstaða tækirannsóknar á brunanum liggur nú fyrir samkvæmt upplýsingum frá Margeiri Sveinssyni, aðstoðaryfirlögregluþjóni hjá lögreglunni á höfuðborgarsvæðinu. Hún sé í samræmi við þann grun sem lögregla hafi haft frá upphafi - að eldurinn hafi kviknað af mannavöldum. Ekki sé hægt að veita frekari upplýsingar.

Heimildir fréttastofu herma að maðurinn sé grunaður um að hafa ausið eldsneyti á gang húsins og kveikt í.

Kemur til greina að fara í mál við eiganda hússins 

Guðbrandur Jóhannesson, er lögmaður tíu manns sem bjuggu í húsinu og fjölskyldna þeirra sem létust í brunanum.

„Ég sem lögmaður gæti hagsmuna ættingja þeirra sem létust í þessum hörmulega bruna. Enn fremur get ég staðfest að ég gæti hagsmuna þeirra sem urðu fyrir líkamlegu og eignatjóni vegna brunans og á næstunni verða lagðar fram skaðabótakröfur fyrir hönd þeirra aðila þá gagnvart meintum geranda,“ segir Guðbrandur.

Grunur leikur á að brunavarnir hafi ekki verið í lagi og kemur til greina að fara í mál við eiganda hússins, fasteignafélagið HD verk.

„Það mál verður skoðað þegar nánari gögn liggja fyrir,“ segir Guðbrandur.

Rannsókn húsnæðis- og mannvirkjastofnunar á brunanum miðar vel og er stefnt að því að skýrsla verði gefin út í haust. 

Stofnunin rannsakar alltaf eldsvoða þegar manntjón verður og þegar um er að ræða mikið eignartjón. Rannsóknin er óháð rannsókn lögreglu.

Markmiðið er að rannsaka eldsvoðann, kröfur eldvarnaeftirlits og hvernig að slökkvistarfi hafi verið staðið. Niðurstöðum er ætlað að leiða í ljós hvort eitthvað hafi verið ábótavant hvað þessa þætti varðar. Einnig er byggingin skoðuð og hvort breyta þurfi reglum og leiðbeiningum stofnunarinnar.

„Rannsókninni miðar vel og stefnt er að því að skýrslan komi út í haust. Ljóst er að bregðast þarf við þeim brunum sem verið hafa í gömlum timburhúsum að undanförnu,“ segir Davíð Snorrason, forstöðumaður brunamála hjá Mannvirkjastofnun. 

„Stofnunin undirbýr nú gerð leiðbeininga sem sérstaklega taka á brunavörnum í gömlum timburhúsum og hvað þarf að hafa í huga við endurgerð og breytingar í slíkum húsum.“