Johnson og Matsuyama efstir fyrir lokadaginn á BMW mótinu

Dustin Johnson og Hideki Matsuyama eru efstu tveir kylfingarnir fyrir lokadaginn á BMW-meistaramótinu í golfi, sem er hluti af PGA.

Þeir eru báðir á samtals einu höggi undir pari eftir þrjá hringi og eru einu kylfingarnir sem eru undir pari á mótinu eins og er. Báðir spiluðu þeir á 69 höggum í dag, tveimur höggum undir pari.

Rory McIlroy var efstur fyrir daginn í dag. Hann lék á tveimur höggum yfir pari á hringnum í dag og er núna í þriðja sæti ásamt þremur öðrum kylfingum, samtals á einu höggi yfir pari.

Tiger Woods hefur ekki náð sér á strik á þessu móti og hefur leikið alla þrjá hringi mótsins yfir pari vallarins. Hann er í 55. sæti á samtals tíu höggum yfir pari.

Lokahringurinn á morgun verður í beinni útsendingu á Stöð 2 Golf. Útsending hefst á slaginu 16:00.