67 sm bleikja úr Hörgá

Við fáum ekki oft fréttir úr Hörgá en þessi á leynir oft svakalega á sér og þá sérstaklega í síðsumarsveiði.

Þarna má gera frábæra veiði á góðum degi á sjóbleikju og þegar líður á tímabilið er ekki óalgengt að setja í stórar. En ég er ekki viss um að Guðrún Una Jónsdóttir hafi átt von á því að setja í 67 sm sjóbleikjuhæng enda eru sjóbleikjur af þessari stærð ansi fátíðar en eru þó að verða algengari með þeirri viðleytni veiðimanna að sleppa mikið af bleikju aftur eftir viðureign. Afraksturinn er sá að sífellt fleiri stórar bleikjur veiðast.

Þessi glæsilega bleikja er ein af þeim stærstu sem við höfum frétt af í sumar og óskum við Guðrúnu til hamingju með þennan glæsilega feng. Þessum flotta fisk var sleppt aftur að lokinni viðureign.