Sjúkra­flutninga­menn tóku á móti barni sem flýtti sér í heiminn

Sjúkraflutningarmenn aðstoðuðu í nótt lítinn dreng við að koma í heiminn en móðirin sem býr úti á landi hafði komið sér til Reykjavíkur til að eiga barnið. Þegar kallið svo kom gekk það svo hratt að ekki gafst tími til að fara á fæðingardeildina og fæddist drengurinn á fimmtu hæð í húsi í Grafarvoginum að því er fram kemur í Facebookfærslu slökkviliðsins á höfuðborgarsvæðinu.

Að sögn slökkviliðsins hefur fjöldi sjúkraflutninga aukist mikið eftir að haustið gekk í garð og voru 111 sjúkraflutningar boðaðir síðasta sólarhringinn, þar af 26 forgangsverkefni og eitt vegna kórónuveirunnar.

Dælubílar slökkviliðsins voru kallaðir út fimm sinnum og voru verkefnin af ýmsum toga, þó ekkert þeirra hafi verið stórt. Slökkviliðið fór tvisvar til aðstoðar sjúkrabílum við umferðarslys og slökkt var í bíl sem kviknaði í í austurborginni í nótt.