Þrýstingur eykst á Johnson að herða aðgerðir

Þrýstingur eykst á Boris Johnson, forsætisráðherra Bretlands, um að herða aðgerðir til að hefta útbreiðslu kórónuveirunnar eftir að fregnir bárust um metfjölda dauðsfalla af völdum veirunnar.

367 andlát voru rakin til Covid-19 í Bretlandi í gær og 23 þúsund manns voru greindir með veiruna.

Aðgerðir í landinu hafa verið stigskiptar, þannig að þær sem eru mest hamlandi fyrir almenning og viðskiptalífið gilda eingöngu fyrir verst settu svæðin.

Nú virðist Johnson þurfa að taka ákvörðun um hvort hörðustu aðgerðirnar þurfi að gilda einnig fyrir landið allt.

Ráðgjafar ríkisstjórnarinnar óttast að dagleg dauðsföll sem talin eru í hundruðum og rekja megi til faraldursins sé ástand sem kunni að vara í allt að þrjá mánuði.

Alls hafa um 59 þúsund manns látist í farsóttinni í Bretlandi, eftir því sem fram kemur á fréttavef Sky News.