Fjórir greindust með veiruna í gær og voru allir í sóttkví

Þetta kemur fram í uppfærðum tölum á vef Almannavarna og Landlæknisembættisins, covid.is.

Þá greindust níu manns á landamærunum. Af þeim eru tveir með virkt smit og einn með mótefni, en sex bíða niðurstöðu mótefnamælingar.

186 manns eru nú í einangrun, en fjöldinn var 195 í gær. Þá eru 500 í sóttkví í dag, samanborið við 544 í gær.

Af þeim fjórum sem greindust í gær greindust tveir eftir svokallaða einkennasýnatöku og aðrir tveir eftir sóttkvíar- og handahófsskimun.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur, er nú 45,3 en var 45,5 í gær. Þá er nýgengi landamærasmita nú 8,2 en var 10,4 í gær.

Alls hafa nú 5.482 manns greinst með kórónuveiruna á Íslandi frá upphafi faraldursins. Af þeim sem greinst hafa með Covid-19 hér á landi eru 27 látin.

Alls voru tekin 444 einkennasýni hjá sýkla- og veirufræðideild Landspítalans og Íslenskri erfðagreiningu í gær og 585 sýni á landamærunum eða í seinni landamæraskimun. Þá voru tekin 50 sýni í svokallaðri sóttkvíar- og handahófsskimun.

Fréttin hefur verið uppfærð.